When I came across this version on Bilbegateway I just have to share.
Numba 1 Fo Da Corint Peopo 13:1-5Hawai‘i Pidgin (HWP)
Love an Aloha
13 If I wen talk all da diffren kine languages, da peopo kine language an even da angel kine languages, but I no mo love an aloha, wat den? I ony talking rubbish kine, jalike one junk kine bell o one kalangalang cymbal. 2 An if I was one talka fo God, an I wen know all kine secret stuffs an all da kine stuffs dat da smart guys know, an if I wen trus God all da way so I can even make da mountains move, but I no mo love an aloha, wat den? I worth notting, dass wat. 3 If I wen sell all my stuffs an use da money fo give food to da poor peopo, an even sacrifice my body in da fire, but I no mo love an aloha, wat den? Poho, wase time!
4 Wen you get love an aloha, you can handle all kine pilikia an hang in dea long time. You get good heart fo help da odda peopo. You no get jealous cuz da odda guy get someting you like. Wen you get love an aloha, you no need talk big. You no mo big head. 5 You no ack pilau kine. You no ack like everybody gotta do everyting yoa way. You no get huhu fast. Wen you get love an aloha, you no goin rememba all da bad kine stuff peopo wen do to you.